KUZUL AR BREZHONEG katalog an alarc'h

KUZUL AR BREZHONEG

KATALOG AN ALARC'H

Yezhoù all

Mizoù-kas:

3 € (1 levr) 6 € (etre 3 ha 9 levr)

3,50 € (2 levr) 10 € (10 levr ha +)

Skigner : An Alarc'h

Ma fell deoc'h prenañ levr pe levr, kasit ho chekenn (warni priz al levr(ioù) + ar mizoù-kas), da:

AN ALARC'H
14 Louzaouenn-an-Hañv / rue du Muguet
22300 LANNUON

Ckekenn da lakaat war anv KUZUL AR BREZHONEG

Amañ ha du-hont / Ici et là-bas Per an Intañv Eñvorennoù - Divyezhek 15 x 21 cm - 202 p. - 10 euro ISBN 978-2-9520238-9-1
Per an Intañv, labourer-douar o chom e Plistin, en deus lezet eñvorennoù war e lerc’h: reoù e vuhez pemdeziek, prizoniad etre 1940 ha 1945 en Alamagn, pell eus ar gêr, ur mare kriz ha kalet; hag ivez reoù e stourm evit gwellaat stad ar feurmourien vihan goude ar brezel, da heul Tangi Prigent. Levr divyezhek, un darn e brezhoneg, un darn e galleg hep na glotfe dre ret an div destenn an eil gant eben.
Andon ar gasoni Mich Beyer Romant 12 x 19 cm - 186 p. - 9 euro ISBN 978-2-916835-33-4
Ur romant polis eo al levr-mañ. Charlez Riwalan, 43 vloaz, tavarnour ha gwerzher levrioù, 'zo bet kavet marv en e stal. Arm an torfed zo da Rozenn Urcun, koñversantez war he leve hag o chom war Enez-Sun, ur gontell-baper zo bet kavet plantet er c’horf. Aes an afer. Re aes hervez an ensellerien Malgorn ha Keruhel... Skrivet he deus Mich Beyer romantoù (Kan ar Mein, Etrezek an enez, Teñvalijenn) ha danevelloù (Azigoragazar, Lina).
An erc'h du Marsel ar Barzh Eñvorennoù 15 x 21 cm - 192 p. - 13 euro ISBN 2-9520238-3-2
Ur spered lemm, ur spered dieub e bedoù “sparlet” (pevar bloaz kloerdi, ur bloavezh koñje, ha dreist pep tra pemp bloaz e kampoù-bac’h Bro-Alamagn e-kerzh ar brezel-bed diwezhañ), setu penaos e c’halljed termeniñ red buhez Marsel ar Barzh. Taolet en devoa war ar paper, deiz-ha-deiz e brezhoneg, prederiadennoù ha soñjezonoù da heul darvoudoù e vuhez. Lennet e vez e zeizlevr evel ur romant, unan kriz evel m’eo bet e vuhez verr, maget bepred avat gant karantez, fent ha spi…
An Ti a Drizek Siminal Roparz Hemon - adembannadur - Roman polis - Brezhoneg eeun 12 x 19 cm - 182 p. - 9 euro ISBN 978-2-916835-23-5
"A-greiz-holl, ur prenestr er beg-douar-se, dres dirazañ, a voe goulaouet. Ha Youenn ha treiñ e lunedenn etrezek ar gouloù. Bez' e welas daou zen oc'h en em gannañ. Unan a savas e vrec'h. Ur gontell a oa gantañ en e zorn. Sankañ a reas ar gontell e bruched egile. Ar gouloù kerkent, a voe mouget." Youenn Jigouzo, kazetenner en Oriant, a zo deuet da Gameled da vakañsiñ. Kerkent hag an noz kentañ avat ez eo test eus ul lazhadenn graet en un ti a zo brud iskis gantañ: an Ti a Drizek Siminal… Ur romant polis aes da lenn, savet e Brezhoneg Eeun diazezet war ar mil ger implijet ar muiañ er yezh — peadra d'an deskerien da lenn hep terriñ o fenn o klask er geriadurioù.
Ar forzhioù a gomz Eve Ensler, tr. Ninnog Latimier C'hoariva 12 x 19 cm - 68 p. - 8 euro ISBN 978-2-916835-21-1
Eve Ensler a zo bet ganet e 1953 er Stadoù-Unanet. Savet he deus “The vagina monologues” e 1996 ha c’hoariet eo bet ar pezh e Broadway da gentañ hag abaoe koulz lavarout er bed a-bezh. Hollvrudet ez eo bremañ ha troet eo bet en un hanter-kant yezh bennak. Da-heul he deus krouet an aozadur V-day gant ar pal reiñ ar gomz d’ar merc’hed ha difenn anezho a-enep ar feulster a c’houzañvont re alies. Gouzout a ra Eve Ensler, en he skrid, rentañ gant fent ha from al levenez bezañ plac’h ha dreist-holl ar stourm o deus ar merc’hed da ren evit bezañ dieub war dachenn o seksualegezh.
Argantael Abeozen Romant 12 x 19 cm - 60 p. - 6 euro ISBN 978-2-916835-28-0
Da vare brezel-diabarzh Bro-Spagn ha Talbenn ar Bobl e Bro-C’hall, en em gav asambles Lena hag Alan, daou zivroad yaouank, e Pariz e 1937. “Argantael” a zo un drama karantez fromus en un aergelc’h politikel.
Ar gariadez vaen Yann Fulub Dupuy PRIZ LANGLEIZ 2007 Romant 12 x 19 cm - 284 p. - 11 euro ISBN 978-2-916835-02-0
Peseurt kevrin 'ta a zo kuzhet e milendall un iliz-veur sebezus a seblant bezañ e-maez an amzer? Abaoe m'eo deuet Yann da studiañ anezhi e c'hoarvez marvioù skrijus enni... Ha rankout a reer teurel kred war ar mojennoù kozh a ra anv eus ur "manac'h" a vije o hentiñ an iliz-veur-se? Goude e desteni Par Dibar (2006), graet fed vat dezhañ, e kinnig Yann Fulub Dupuy ur romant polis ha fantastik a oa war e spered abaoe un ugent vloaz bennak. Priz Langleiz a zo bet roet dezhañ evitañ.
Ar gitar tredan Jakez-Erwan Mouton Romant 12 x 19 cm - 102 p. - 8,50 euro ISBN 978-2-916835-17-4
E dibenn an ugentvet kantved emañ ar sonerezh punk gant e skedoù diwezhañ. Erwan, paotr bord ar mor, eo gitarour ha pennkaner ar strollad The Privateers. Ha treuzañ a ray e sonerezh ar speurenn en deus savet etre ar bed hag eñ? Daoust ha lakaat a ray e galon da vezañ leuniet gant karantez? Gwall rouestl a zegaso e buhez Estelle, plac'h kêr, poellek ha parfet, tapet he c'halon gant unan all dija. Jakez-Erwan Mouton a daolenn dimp un istor tud ha karantez e kevredigezh disleberik ha reuzus studierien ha yaouankizoù an amzer-se. Priz kentañ ar Yaouankiz en devoa tapet e 2007 gant e romant "Katrina".
Ar prenestr arc'hant Per Pondaven Barzhonegoù 14,8 x 21 cm - 120 p. - 12 euro ISBN 978-2-916835-25-9
Anavezet eo Per Pondaven evit e labourioù war ar brezhoneg (anvioù divoutin, bed ar mor...). Ne oa ket anavezet tamm ebet e varzhonegoù, manet diembann betek-henn. Kreñv ha don int koulskoude, berr o stumm, levezonet kenañ gant brezhoneg arvor Bro-Leon, an hini a rae gantañ bemdez. Un den a furnez e oa Per Pondaven o prederiañ etre e sae hag eñ war follentez ar bed, sed e kaver soñjoù du en enno alies, ha bez’ ez eus anezho ul lidadenn wir en enor d’an natur ha d’ar mor dreist-holl. Ar mor, e vuiañ karet, en deus lonket bag ha den un devezh yen e miz Genver 2008. Diwar zorn Pierre Guerrier eo ar skeudennoù savet a-ratozh evit mont gant ar pezhioù barzhoniezh an dastumad, ha gant Cheun ar Gall eo bet savet ar rakskrid.
Ar roc'h / Le roc Yann Fulub Dupuy Danevelloù - Divyezhek 12 x 19 cm - 180 p. - 10 euro ISBN 978-2-916835-12-9
Bodet ez eus bet amañ istorioù berr : karantezioù diaes dezho dont da wir, bout sevenet, bout diskuliet, buhezioù foeltret gant an dilavar pe an argrediñ.
Breizh thriller Y. Kerchalez Romant - Divyezhek 12 x 19 cm - 256 p. - 9,50 euro ISBN 2-9520238-8-3
War a seblant eo bet skrapet kelenner brezhoneg ar skolaj… Daoust d’an diskred e klasko e skolajidi war e lerc’h e trowardroioù Roazhon. Suspens, ha fent ivez, a-hed an istor-mañ, hep ankouaat ar garantez a vleunio etre an daou grennard a gas an enklask war-raok, Gwenn hag Alex. Savet eo bet an istor-mañ gant skolajidi Skolaj Les Chalais e Roazhon gant skoazell o c’helennerez, Caroline Ollivro. Brav eo deuet o zaol ganto gant an istor frammet mat-mañ hag aes da lenn.
Brezhoneg Goueloù Ronan Koadig Yezh 14,8 x 21 cm - 150 p. - 12 euro ISBN 978-2-916835-20-4
Brezhoneg Goueloù — hag a vez komzet dre vras etre Pempoull ha Gwengamp — eo moarvat ar rannyezh anavezet an nebeutañ eus ar brezhoneg. Alies ne vez ket kemeret e kont, ’zo kaeroc’h, ha lakaet e vez da heul hini Treger. Mard eo gwir en deus kalz a berzhioù boutin gant hemañ en deus kalz a berzhioù all dioutañ e-unan ivez : e daol-mouezh da gentañ penn, e c’herioù, e droioù yezhadur... Perzhioù en deus ivez hag a vez adkavet, pe e Kernev-uhel, pe e Bro-Wened, pe c’hoazh e brezhoneg Bro-Naoned. Hag evit gwir eo un darn eus « brezhoneg ar reter » a veze komzet e Breizh-Uhel gwechall. Ronan Koadig, kelenner e skol-veur Roazhon 2, a ginnig dimp amañ an doare brezhonek, adwelet ha kresket, eus ur studiadenn en devoa kaset war-raok e penn kentañ er bloavezhioù 1980.
C'était comme ça Herve Herri Eñvorennoù 11,5 x 18,5 cm - 210 p. - 12 euro ISBN 978-2-916835-18-1
E 1982 ec’h embannas Al Liamm Evel-se e oamp (priz Langleiz 1981), skrivet gant Herve Herri, anv pluenn Per Roy. Kontañ a ra ennañ e eñvorennoù pa oa krennard o teskiñ ar vicher en un ti-moullañ e Montroulez e penn kentañ an ugentvet kantved. Izili eus ar gevredigezh Kelc’h Sevenadurel Brezhonek Bro Montroulez o deus troet an destenn e galleg.
Erwan Kerou, barzh Plougonveur Skridoù strollet gant Pascal Leprêtre Barzhonegoù 14,6 x 20,6 cm - 112 p. - 10 euro ISBN 978-2-916835-08-2
Erwan Kerou (1873-1956), Tregeriad, a zo bet labourer-douar hag ezel eus Goursez ar Varzhed. Skrivet en deus bet, betek 1927, pennadoù a bep seurt hag a denne d'ar Brezel 14, d'an natur hag ivez d'ar garantez, e kelaouennoù ar mare-se : Kroaz ar Vretoned, Arvorig, Breiz... Anavazet eo ivez e Plougonveur evit bezañ sikouret tud ar vro da skrivañ o lizheroù. Ur barzh-labourer test eus un amzer zo bet.
Etrezek an enez Mich Beyer PRIZ LANGLEIZ 2008 Romant 12 x 19 cm - 112 p. - 8,50 euro ISBN 978-2-916835-01-3
Tamm-ha-tamm e tigor Fant levr he buhez: bugaleaj, yaouankiz, oad gour, kozhni... Gant kizidigezh ha donezon e oar Mich Beyer kas al lenner a-hed gwenodennoù ur vuhez leun a garantez hag a vignoniezh, luskellet gant ar sonerezh hag ar mor. Mich Beyer he deus bet priz Frañs 3 ar romant gwellañ e brezhoneg e 2007 evit Seizh devezh warn-ugent.
Geriadur an arvor Per Pondaven Geriaoueg 14,5 x 20,5 cm - 90 p. - 10 euro ISBN 978-2-916835-13-6
A-raok dezhañ koll e vuhez war vor, hag eñ gwall yaouank c’hoazh (45 bloaz ne oa ken), en doa kaset Per Pondaven ur pezh mell labour dastum e-touez brezhonegerien Arvor Bro-Leon. Anavezet eo bremañ e labourioù diwar-benn an anvioù-lec’h hag an anvioù-tud. Savet e oa bet ivez gantañ ur geriadur hag a ziskouez deomp gerioù bet klevet e-touez Arvoriz ha komprenet mat c’hoazh an darn vrasañ anezho. Teir lodenn a ya d’ober ar studiadenn-mañ. Da gentañ, ar gerioù implijet e lec’hanvadurezh bord ar mor, gant skouerioù prizius roet da heul. Da eil, „ar mor o vevañ“, kaoz a vez diwar-benn ar mor, fur pe foll, ar mareoù hag an divareoù, atav gerioù bet testeniet el lec’hanvadurezh. An trede a zo disheñvel un tammig: gerioù teknikel hag a sell ouzh ar pesketaerezh. Ul labour pizh ha pinvidik eo hag a zeu da greskiñ a-feson hon anaoudegezh eus brezhoneg ar mor.
Geriadur ar brezhoneg komzet Bernard Chapalain Geriadur 14,5 x 20,5 cm - 169 p. - 12 euro ISBN 978-2-916835-22-8
Pa gave gantañ e oa dishañval a-walc’h ar brezhoneg skrivet diouzh ar brezhonegoù a gleve en-dro dezhañ eo bet Bernard Chapalain o tastum e-mesk an dud penaos e veze lavaret an traoù gante. E Bro-Oueloù en deus labouret da gentañ ha ledanaet an dachenn da Vro-Dreger ha da Gernev-Uhel. E doare ur geriadur galleg-brezhoneg eo graet e labour ha meur a stagadenn da heul diwar-benn danvezioù a bep seurt (anvioù plant, troioù-lavar, gerioù doareañ fentus pe goapaus...). Ur skeudenn eo eus ar brezhoneg komzet e tro ar c’hantved e rannoù eus Breizh ha na oant ket bet studiet kalz betek neuze.
Geriaoueg luc'hajoù ar brezhoneg / Vocabulaire argotique breton Divi Kervella Geriaoueg 10 x 21 cm - 96 p. - 9 euro ISBN 978-2-9520238-2-4
Betek-henn e veze lezet gant ar geriadurioù tachenn al luc’hajoù a-gostez. Gant al levr-se e c’hallo al lennerien, a-benn ar fin, ober anaoudegezh gant ar “yezhoù kuzh”.
Gouloù Salomon Bryan Delaney, tr. Malo Bouëssel du Bourg Romant 10 x 19 cm - 60 p. - 5 euro ISBN 978-2-916835-15-0
Salomon a zo anezhañ ul lampon pevarzek vloaz hag a vev en ul lochenn e biojoù ur gêr vihan. Kerzhet a ra betek plasenn kreiz-kêr gant e gi, e Vibl mastaret, ha kaouedadoù pintiged. Krapat a ra gant ur wezenn ha diwarni ec'h embann war ar groaz munudoù fallagriezh kuzhet kêriz. Gogeal a ra Salomon. Sevel a ra kanaouennoù ha prezegennoù ferv ha fentus war un dro, en ur varmouzañ gant dansoù feuls ar re a zo o pakañ o fegement gantañ. Met, a zeiz da zeiz, bep ma tispak e zonezonoù dreistwelour, e teu da vezañ dall gant ar banne. Daoust ha gallout a raio ar gumuniezh mantret ha mezhekaet pardonañ dezhañ bezañ bet he c'houstiañs fall. Sed ur flemmgan modern diwar-benn pilpouzerezh hor c'hevredigezh. Bryan Delaney n'en deus ket e bar evit kemmeskañ fent, krizder ha barzhoniezh. E yezh rust ha livus a vo kavet da, hep ket a var, gant ar re a blij dezho helavarded Synge ha gwirvoudelezh O'Casey.
Hañvig foar an nec'h & Un nozvezh hañv Roparz Hemon Danevelloù 10 x 19 cm - 50 p. - 5 euro ISBN 978-2-916835-06-8
Hañvig Foar an Nec’h Daoust ha fur e oa da Wilh mont en-dro da Garanteg bloavezhioù goude bezañ tremenet tri miz eno o tiskuizhañ? Un nozvezh hañv Brav eo mont da foetañ bro war varc’h-houarn, brav ivez kaout bod e ti ur mignon kozh war bord ar mor ha koulskoude e c’hoarvezo un darvoud dic’hortoz a-grenn gant Ivon. Diembann e-barzh levrioù e oa an div zanevell-mañ, bet skrivet gant Roparz Hemon war ziwezh e vuhez. E barr e arz danevelliñ e tiskouez bezañ ganto. Troc’hadoù buhez gwelet gant daoulagad tud yaouank… pe doare Roparz Hemon da welet e yaouankiz ur wech erru war an oad?
Huñvreoù Pêr Mortolod Jef Gedez Danevelloù 15 x 21 cm - 176 p. - 13 euro ISBN 978-2-9520238-5-9
Pêr Mortolod, distro d’e vro c’henidik, a zo maget e huñvreoù gant skeudennoù maouezed iskis. Un deiz e teu unan war-wel da vat! Jef Gedez a ginnig dimp peder danevell awenet gant an natur, darvoudoù e vuhez ha bro e vugaleaj, ma kaver enno marzh, kevrin ha tud dic’hortoz.
Kan ar Mein Mich Beyer Romant 12 x 19 cm - 238 p. - 11 euro ISBN 978-2-916835-16-7
2008. Den ne oar pelec’h eo tremenet Aleks Pennanroz... Da grediñ ’zo eo steuziet mik an den yaouank goude ma oa bet profet ur CD dezhañ gant e vignon Gabriel Gwareger, ha ma oa aet betek abati Boisgermont da beurgas ur studiadenn da benn... 1348. Tec’het kuit ur manac'h yaouank donezonet eus un abati da heul steuziadenn ur parch sonerezh dibriz ha marv kriz unan eus ar venec'h... Dreist d’ar c'hantvedoù, dre hentoù arvarus an Amzer, eo e tisoc'ho an istor-mañ. Setu amañ pevare romant Mich Beyer embannet e ti an Alarc’h. Tapet he deus un dornad mat a brizioù evito : priz frañs 3, priz Langleiz, priz Sten Kidna, priz Imram. Ha mall vez bepred gant al lennerien dizoloiñ he skridoù nevez.
Karantez dispaket A-stroll Lizhiri 13 x 23 cm - 128 p. - 10 euro ISBN 978-2-916835-03-7
An Alarc'h embannadurioù en deus kinniget da baotred ha da verc'hed a oadoù hag a vroioù disheñvel, anavezet mat dija evit o skridoù pe ar wech kentañ dezho mont da zuañ paper, skrivañ pep a lizher karantez e brezhoneg. Un tregont bennak a zo bet miret, lod e komz plaen, lod all e doare ur varzhoneg pe kanaouenn.
Karavell Un dibab 16 danevell Danevelloù E brezhoneg : 12 x 19 cm - 218 p. - 12 euro ISBN 978-2-916835-32-7 E galleg : 12 x 19 cm - 228 p. - 12 euro ISBN 978-2-916835-34-1
Setu amañ un dibab 16 danevell e brezhoneg bet skrivet a-hed ur c’hantved pe dost gant skrivagnerien a bep seurt, darn anavezetoc’h eget darn all (Herve Bihan, Alan Botrel, Per Denez, Daniel Doujet, Yann Fulub Dupuy, Maï Ewen, David ar Gall,Yann Gerven, Roparz Hemon, Maguy Kerisit, Goulc’han Kervella, Jakez Konan, Jef Philippe, annaig Renault, Jakez Riou). Gant an diouer a gelennadurezh lennegel e brezhoneg a zo er skolioù dre vras, en devo al lenner evel-se un tañva eus ar pezh a c’heller dizoleiñ en hor yezh er rummad “danevelloù”, un doare skrivañ priziet kenañ gant ar vrezhonegerien, koulz gant ar re a skriv ha gant ar re a lenn. An dibab danevelloù-mañ a gaver troet e galleg gant Mich Beyer en ul levrenn all e ti an embanner, hag e-se e c’hallo al lennerien diampart kavout ganti un tamm harp.
La grammaire bretonne pour tous Eugène Chalm PRIZ "PRODUIT EN BRETAGNE" 2009 Yezh - Yezhadur 15,5 x 23,5 cm - 240 p. - 16 euro ISBN 978-2-916835-07-5
Ur yezhadur eus ar brezhoneg e galleg graet evit ar re a zo o teskiñ pe war studi ar yezh, hag ivez evit kement hini c'hoant gantañ da wellaat e implij eus ar brezhoneg. Savet eo bet da gentañ gant Eugène Chalm pa oa kelenner brezhoneg ha difazier Skol Ober pa wele pelec’h ha penaos e teuke an deskarded. Adwelet ha kresket eo bet an danvez gant kelennerien Skol Ober. Gant ur yezh aes hag eeun e ra al levr-mañ tro lodennoù pennañ ha diazez ar brezhoneg. Diouer bras e rae seurt benveg evit an deskidi, ar skolidi hag ar studierien ha kement hini a glask komz ha skrivañ brezhoneg bemdez.
Langoat et ses noms de lieux Kevredigezh "Vivre à Langoat" Studiadenn 14,5 x 20,6 cm - 114 p. - diviet ISBN 978-2-916835-19-8
Studiet eo bet anvioù-lec'h Langoad (Bro Dreger) gant ar gevredigezh "Vivre à Langoat" ha Divi Kervella. Kavet vo ivez el levr pennadoù diwar-benn istor ar vro ha studiadennoù diwar-benn ar gerioù "kêr" ha "komanant " ken niverus e Breizh Izel.
Le pèlerin de la Toussaint Abeozen Danevelloù 12 x 19 cm - 198 p. - 12 euro ISBN 978-2-916835-27-3
Troidigezh gallek 16 danevell tennet eus an dastumad Pirc’hirin Kala-goañv bet embannet gant Al Liamm e 1969 hag e 1986. Troet eo bet an istorioù-se, a c’hoarvez etre an daou vrezel-bed e Bro-Leon, gant Mikael Madeg.
Le Vieux-Marché / Ar C'houerc'had, ses noms de lieux et leur histoire Association "ARSSAT Lannion" Studiadenn 14,8 x 21 cm - 132 p. - 11 euro ISBN 978-2-916835-31-0
Le Vieux-Marché / Ar C’houerc’had a zo ur studiadenn e galleg diwar-benn 165 anv-lec'h er gumun. A-drugarez da destennoù ha luc'hskeudennoù a bep seurt e tizoloer ivez glad ar C'houerc'had, chapelioù, kroazioù, milinoù ha feunteunioù hag ivez un tamm eus istor ar gêr Kavet e vez ivez, el levr-mañ, un nebeud titouroù diwar-benn Anjela Duval ha Fañch an Uhel o-daou genidik eus ar C'houerc'had.
Llena Davies & Foar Vre G.B. Kerverzhioù Danevelloù 10 x 19 cm - 50 p. - 5 euro ISBN 978-2-916835-04-4
Llena Davies Roazhon er bloavezhioù ’40. Stan a labour e rann ar skiantoù er skol-veur, eno ivez emañ Llena o studiañ. Penaos ec’h echuo an darempredoù etre an daou zen yaouank-mañ? Daoust ha gallout a reer lakaat da glotañ gwarizi gant karantez, speredoù dieub gant speredoù entanet? Souezhus eo bet istor an danevell-mañ, skrivet en un doare modern-kenañ a-raok ar brezel, ha bet embannet en un doare damguzh dre ma veze taolennet enni, evit ar wech kentañ e brezhoneg, darempredoù korf etre ur gwaz hag ur vaouez. Ken diaes e oa da gavout ken e oa deuet da vezañ ur seurt “mojenn”. Foar Vre Un estrañjourez o kemer an tren hag o vont da foar ar c’hezeg war Dosenn Menez-Bre; netra souezhus, emezit-hu? An danevell-mañ, lakaet da vezañ unan eus ar re wellañ bet skrivet e brezhoneg, a souezho al lennerien.
Ma bloavezh konikl e Korea Sylvie Servan-Schreiber, tr. Gireg Konan Albom evit ar vugale 19 x 25 cm - 32 p. - 8 euro ISBN 978-2-916835-24-2
E vakañsoù emañ Mael ha Maiwenn e Breizh e ti o zud-kozh, Tadig-kozh ha Mammig-kozh. Soner gourrebed eo Tadig-kozh, deuet eus Korea pell ‘zo. Breizhadez ha c’hoarierez telenn eo Mammig-kozh. Deskiñ a raio ar vugale penaos e veze deiz kentañ ar bloaz e Korea pa oa bihan Tadig-kozh. Emañ eus arouez ar c’honikl e zodiak Sina. Aozañ a raint ur wastellenn garotez evit e drugarekaat!
Pa ra glav Leire Salaberria Evit ar re vihan 24,5 x 21,5 cm - 36 p. - 10 euro ISBN 978-2-916835-30-3
Setu ul levrig evit ar vugale oc’h reiñ meuleudi d’ar glav. Na pegen brav vez an disglaverioù a bep seurt liv er straedoù, na pegen plijus gwelet ar gwez o c’hlasaat ha sellet dre ar prenestr ar glav pil oc’h ober hep ankounac’haat mont da c’hoari er poulloù-dour ! Al levr-mañ skrivet ha skeudennaouet gant Leire Salaberria en deus bet priz kentañ priz V Premio Etxepare 2011 ar gwellañ levr savet en euskareg evit ar vugale. Troet eo bet e brezhoneg gant R. Kervella.
Par dibar Yann Fulub Dupuy Romant 12 x 19 cm - 128 p. - 8 euro ISBN 978-2-9520238-7-5
Testeni gwirion ha didroidell ergerzhadenn ur paotr yaouank war glask e wir bersonelezh p’en deus dizoloet e “zibarelezh”, e oa un heñvelreviad anezhañ. Graet eo ivez an testeni-mañ evit skeiñ rakvennozhioù a-blaen, evit reiñ da c’houzout ha neuze da gompren.
Piv a glevo? Herve ar Gall PRIZ LANGLEIZ 2003 Romant 11 x 18 cm - 240 p. - eilembannadur - 12.5 euro ISBN 978-2-9520238-1-8
Piv a glevo? a gont istor ur c’hrennard war vord ar mor e korn-bro Sant Brieg da vare brezel Aljeria. Etre daou gaouad berralan e tizolo Lanig, ar paotr dilu, bed ar re vras, n’eo ket hepken e-skeud mammig Môn, tener ha karantezus, hag e dad gloazet, komunour e-maez linenn ar strollad, stourmer pennek a gemer perzh en darvoudoù, met ivez da heul “paotred fall” prest bepred da c’hoari las.
Seizh devezh warn-ugent Mich Beyer PRIZ FRAÑS 3 2006 Romant 12 x 19 cm - 136 p. - 8,50 euro ISBN 978-2-9520238-6-7
Da heul ur bellgomzadenn dic’hortoz digant e vignonez kozh Rachel e tistro Ludo war lec’hioù e garantez aet da vruzun. Etreze o-daou e ren c’hoari skoemp hag arvarus ar vemor hag an dazont o tegas tro-ha-tro nesaelezh hag eneberezh. E-keit ma vez an den yaouank o livañ tresoù ur vuhez nevez diwar e eñvorennoù, plijus pe boanius e vefent, e chom ar vaouez sac’het e lagenn hec’h amzer dremenet. Etre lusk ar gest ha touell ar milendall.
Sizhun ar breur Arturo Youenn Drezen Romant 12 x 19 cm - 64 p. - 6 euro ISBN 978-2-916835-26-6
Breur Arturo, danvez-lean, a zo bet lakaet da gempenn ar chapel. Setu ur plac’h yaouank eus kêr, Palmira, o tont da bediñ an Aotrou Doue hag ar Werc’hez e-barzh ar chapel-se hag ar manac’h yaouank neuze oc’h en em lakaat da sellet outi. Sevel a raio neuze ur brezel diabarzh e kalon hag e penn ar manac’h... Unan eus pennoberennoù ar skrivagner eo an danevell hir-mañ a vez embannet amañ evit ar pevare gwech. Un heklev eo eus ar pezh a oa c’hoarvezet gantañ pa oa war e studi er c’hloerdi hag a cheñchas mik e vuhez.
Skrapadenn ar paotr a zalc'he koun eus e vuhez kent Satyajit Ray, tr. Yann Varc'h Thorel Romant 12 x 19 cm - 198 p. - 10,50 euro ISBN 978-2-916835-00-6
Moukoul, ur paotrig 10 vloaz, en deus galloud, dre e hunvreoù, da zistreiñ d'ur vuhez kent. E dad, goude bezañ klevet anezhañ o komz eus traezh ha pauned, traoù hag a zo dibaot ha dianav d'ar paotrig, a ya da gaout Felouda, un enklasker brudet. Ha setu Moukoul ha skipailh an enklasker war hent ar Rajasthan evit klask un teñzor kuzhet. Met n'emaint ket o-unan. Piv a erruo da gentañ?
Tan ha skorn an noz A-stroll Danevelloù 12 x 19 cm - 112 p. - 9 euro ISBN 978-2-916835-09-9
Digoret eo bet dorioù an noz gant 10 skrivagner a-vremañ. Etre daou benn an noz e tiskouez an traoù bezañ amplaet ha kizidikaet: ar skrij, ar garantez hag ar fent... du?
Teñvalijenn Mich Beyer Romant 12 x 19 cm - 116 p. - 9 euro ISBN 978-2-916835-11-2
Evit peurechuiñ he romant diwezhañ ez a Elena da dremen un toullad devezhioù e sioulder Enez Sav. Met kejañ gant ur skrivagner dianav dezhi war an enezenn a lakao, da vat, mesk ha freuz en he buhez.
Teod ar balafenned Manuel Rivas, tr. Mark Kerrain PRIZ FRAÑS 3 2010 Danevelloù 12 x 19 cm - 56 p. - 6,50 euro ISBN 978-2-916835-14-3
Sonerezh Galiza zo anavezet e Breizh, he lennegezh avat n’eo ket. Poent e oa kavout ul levr gant danevelloù eus ar vro-hont, ha n’haller ket kinnig gwelloc’h eget danevelloù Manuel Rivas, ur skrivagner brudet en e vro. Komz a ra deomp eus e bobl, labourerien, pesketaerien, ha divroidi, doujañs ennañ ouzh an dud reuzeudik, kalet ha bresk war un dro, prest da dec’hel en o hunvreoù. Komz a ra deomp eus karantez, ouzh an dud evel ouzh ar vuhez, en tu all da gorventennoù an ebr hag an Istor. Ur film zo bet savet gant an danevell « Teod ar balafenned » e 1999.
Trema heolioù kuzhet / Vers des soleils cachés Per Dioler Barzhonegoù 14 x 19 cm - 144 p. - 11 euro ISBN 978-2-9520238-0-8
Dastumad divyezhek barzhonegoù skrivet gant Per Dioler, anv-pluenn Per ar Bihan. Kaeret eo al levr-se gant skeudennoù Gaïde Jégou.
Troioù-kamm Alanig al Louarn Jakez Riou Kontadenn 16 x 24 cm - 152 p. - 14 euro ISBN 978-2-916835-29-7
Alanig al Louarn, gaouiad, teod-lidour, treitour, toueller ha brabañser a veve e Breizh setu pell-pell ’zo bremañ. Ne oa ket e bar da itrikañ troioù-kamm evit dont a-benn eus e walldaolioù, betek mont da lakaat a-du gantañ ar roue ha tudjentil e lez. Met pegeit e c’hello padout evel-se ? Ar skrivagner en deus adstummet ur vojenn anavezet mat abaoe ar Grennamzer en Europa a-bezh, hini troioù al Louarn fin. An holl, koulz bras ha bihan, o devo plijadur o lenn pe oc’h adlenn un istor leun a flemm hag a fent skrivet en ur yezh bev-buhezek. Danevellour, barzh, saver pezhioù-c’hoari brudet, Jakez Riou [ 1899 – 1937 ] a chom unan eus hor skrivagnerien wellañ, ha gant ar skrid-mañ e vo gallet gwelet e oa ivez ur marvailher donezonet.
Yezh ar vugale / Le breton des enfants et des tout-petits Herve ar Bihan, Soaz an Tieg Geriaoueg 10 x 21 cm - 96 p. - 10 euro ISBN 978-2-9520238-4-0
Gerioù babig, gerioù moumounañ hag ivez gerioù gourdrouz… Komz ouzh ar vugale vihan hag ivez diwar o fenn… Deuet eo ar gerioù a gaver el levrig-mañ eus bed ar brezhoneg komzet hag ar yezh hengounel. Graet eo ar c’heriaoueg-mañ evit an holl re a sav o bugale e yezh ar vro koulz hag ar re o devez da labourat e brezhoneg gant bugale vihan.