KUZUL AR BREZHONEG katalog barn ha skrid

KUZUL AR BREZHONEG

KATALOG BARN HA SKRID

Yezhoù all

Mizoù-kas:

3 € (1 levr) 6 € (etre 3 ha 9 levr)

3,50 € (2 levr) 10 € (10 levr ha +)

Skigner : Barn ha Skrid

Ma fell deoc'h prenañ levr pe levr, kasit ho chekenn (warni priz al levr(ioù) + ar mizoù-kas), da:

BARN HA SKRID
14 Louzaouenn-an-Hañv / rue du Muguet
22300 LANNUON

Ckekenn da lakaat war anv KUZUL AR BREZHONEG

An Anv Dinamm, An Divarvel Forbannet ha Fur ar Varzhoniezh Yann-Varc'h Thorel Barzhoniezh 14,8 x 21 cm - 101 p. - 9 euro ISBN 2-86863-092-8
Kinniget e vez dimp dizoleiñ arz ha buhez tribarzh sinaat eus an VIIIvet kantved. Gant ur studiadenn war ar varzhoniezh hag he furmoù hag an Istor er mare-hont.
Ar Saouzanenn Bernez Tangi Barzhoniezh 14,5 x 20,5 cm - 89 p. - 6 euro ISBN 2-9525135-5-5
Teirvet oberenn Bernez Tangi e-giz barzh eo al levr-mañ.
Diwar an uhel Lan Tangi Danevelloù 14,8 x 20,6 cm - 131 p. - 10 euro ISBN 2-9525135-4-8
Goude bezañ savet skridoù awenet gant e veajoù a-dreuz ar bed en e dorkad danevelloù kentañ e teu an aozer en-dro d'e vro c'henidik. Lec'hiet eo an danevelloù-mañ e Menez Are hag en e drowardroioù, panevet div, unan war harzoù Kanada-USA hag unan all en India. Buhez meneziz, dezho o doare, e fin ar c'hantved diwezhañ, o vont; trabas-didrabas, gant o zammig-buhez. C'hoantoù, poanioù, stourmoù, kontet war ton ar fent hag ar mousfent. Ganet eo bet Lan Tangi e 1951 e Karanteg (Bro-Leon) ha desavet e Menez Are gant e dud-kozh. Skrivet en deus un torkad barzhonegoù Mousafir e 1997 (priz Langleiz 1998 hag Imram 2001). Ul levr danevelloù Da Goulz an Avaloù (2001), skridoù ul levr luc'hskeudennoù gant Gilles Pouliquen, Menez Are (2003). Ur pezh-c'hoari evit ar radio "Alo, alo, amañ Job" (2007), c'hoariet gant Strollad Kastell. O labourat er gevelouri Roudour, e Karaez, emañ o chom er Fouilhez.
Govel an dremmwelioù Alan Botrel Barzhonegoù 14,5 x 20,5 cm - 202 p. - 11 euro ISBN 2-9525135-3-1
Ganet eo bet Alan Botrel e Ploue e 1954. Goude studioù war ar brederouriezh, ar yezhoniezh hag ar brezhoneg, e rannvro Pariz hag e Breizh, emañ bremañ o kelenn e Skol-Veur Roazhon 2. Embannet en deus ivez un torkad danevelloù ha meur a droidigezh diwar ar gresianeg. Kavet e vo amañ ar barzhonegoù skrivet gant an aozer etre 1972 ha bremañ.
Hin hag Amzer Jean-Luc Dey Barzhonegoù 12 x 18 cm - 131 p. - 9 euro ISBN 2-86863-050-2
Barzhonegoù liesdoare, darn hanter komz-plaen hanter gwerzennoù. Awenet alies gant Iwerzhon, an natur, an amzer a ra hag an amzer o tremen. Heson eo e werzennoù, dreist-holl pa c'hoari gant klotennoù diabarzh hag alies gant klotennoù dibenn.
Kas ha lazh Itsc'hak Katsenelson, Lamed Shapiro, Perets Markish Danevell - Barzhonegoù 14,8 x 21 cm - 200 p. - 14 euro ISBN 2-9525135-0-3
Tri skrid a vezo kavet el levr-mañ. Tri skrid savet e yezh Yuzevien Reter Europa. Un danevell ha div varzhoneg hir. Kan war wallazhadeg ar bobl yuzev gant Itsc'hak Katsenelson. E kêr an anaon gant Laned Shapiro. Ar berniad gant Perets Markish. Tri skrid war an hevelp danvez: ar c'has hag al lazh. O kontañ penaos eus ar progromoù e-tro 1900 e bro-Rousia, eus ar re a c'hoarvezas e-pad an Dispac'h Ruz du-hont, e teuer da euzh Treblinka. Tri skrid troet gant Batia Baum ha Koulizh Kedez.
Kêr al Loened George Orwell, tr. Erwan Hupel Kontadenn 14,8 x 20,5 cm - 98 p. - 12 euro ISBN 978-2-9525135-6-2
George Orwell (1903-1950) a zo da lakaat e-touesk gwellañ skrivagnerien an xxvet kantved. Livet eo bet kudennoù pennañ e amzer en e levrioù : Ar rivin e Pariz hag e Londrez (1933), Kêr al Loened (1945) ha 1984 (1948) e bennoberenn. Setu bremañ embannet e stumm ul levr troidigezh brezhonek Kêr al loened ; diwar ar saozneg gant Erwan Hupel. Ebat eo a zo e Kêr ar Maner : “Hiviziken n’eus ket a vistri ken, hiviziken n’eus ken ’met levenez, kement loen aze zo dieub ha lamm d’an dud fallakr...” Met chomet eo Tual an azen kozh da soroc’hal en tu all d’ar prad. N’aio ket da riboulat gant al loened all, ne raio ket friko, loen put mard eo ne gred ket e cheñcho tra ! Kêr ar Maner pe Kêr al Loened ! An holl loened a zo par emezo... met loened zo a zo paroc’h eget re all... Dispac’h ’mit-hu ?
Istor ur prizoniad Stratis Doukas, tr. Alan Botrel Romant 14 x 19 cm - 80 p. - 5 euro ISBN 2-9525135-1-1
Soudard gresian e 1922, prizoniad an Otomaned, tec’her o vevañ en ur vougev, maesaer o tremen evit un Turk kent adkavout e frankiz… Kontet e oa bet an istor gant ar benndudenn he-unan kent bezañ adstummet meur a wech gant ar skrivagner en doa eñ dastumet. Mirout a reas hemañ ar perzhioù pennañ - an eeunded, ar fedoù hepken - a ra eus an oberenn unan dibar a lenner evel ma selaouer ur marvailher.
Ma Beajoù-me/Enebour ar Barzh Yorgos C'himonas , tr. Alan Botrel Danevelloù 14,8 x 21 cm - 109 p. - 9 euro ISBN 2-86863-084-7
"Dibaot eo an darempredoù etre daou "benn" Europa, en o lennegezhioù pergen. Breizh ha Diougan Gwnc'hlan ne oant ket abeg a-walc'h neoazh din da dreiñ an danevelloù-mañ, daoust d'ar pouezhus ma 'z eo ar werz en oberenn. An divoaz m'eo ar yezh, pinvidigezh ar skrid o taveiñ da hen lennegezh Hellaz koulz da zDiougan Gwenc'hlan (...) eo am broudas da ginnig an oberenn-mañ d'ar vrezhonegerion" eme an troour.
Reun Menez Keldreg, melezour ur vuhez ? Malo Bouëssel Du Bourg Studiadenn 19 x 21 cm - 206 p. - 14 euro ISBN 2-9525135-2-4
"Tost peurlonket gant noz an tremened", "Tonket d'an ankounac'h" dre ma n'en deus embannet nemet ul levr, sed a lavar Malo Bouëssel du Bourg a-zivout Reun Menez Keldreg hag e oberenn ha sed a c'hellfed lavarout kenkoulz all diwar-benn kalzik a skrivagnerion all en hon yezh. Gant ar studiadenn don ha pinvidik-mañ, bet kinniget e Skol-Veur Roazhon 2 e 2004, e addizoloer ur skrivagner a-zoare hag e ved, un den a zellez e skridoù bezañ adlennet. Meur a hent a zigor an aozer hag ur skouer e c'hell bezañ e labour evit kement hini dedennet gant ar skridvarnerezh. Ganet eo bet Malo Bouëssel du Bourg e 1960. Graet gantañ studioù war ar c'henwerzh hag ar brezhoneg e labour e gennad ar gounezvouederezh. Embannet en deus daou dorkad barzhonegoù e galleg ha kenlabouret en deus gant Armor Magazine, Ar Men, Ya... Priz Glenmor 'zo bet roet dezhañ.